Netanyahu ban theih lohna dan chungchang Israel SC-in ngaihtuah

Eiruk avanga thubuai nei mek, Israel prime minister Benjamin Netanyahu ban a nih theih lohna tura dan siam khin letna chu Ningani khan Israel Supreme Court chuan a ngaihtuah.

March thla khan PM Netanyahu leh a thawhpui party-te chuan Prime Minister chu hriselna leh rilru lam harsatna emaw avanga ban an nih theih lohna tur dan hi an siam a ni. Hei hi eirua puhna thubuai bakah thubuai dangte pawh nei mek, PM ṭanglai Netanyahu tan liau liaua siam niin eptu lam chuan an ngai.

Sorkar dan siam thar duh loa petition theh luttu hi Movement for Quality Government in Israel a ni a, Supreme Court-a ngaihtuah a nih lai hian court pawn lamah dan thar duh lohna lantirin mi ṭhenkhat an pung khawm bawk. Court hian thutlukna a siam hun tur hi a la sawi lo.

Hetih lai mek hian Netanyahu kaihhruai sorkar chuan an ram judicial system siam ṭha a, Supreme court thuneihna paih ṭhenna tur bill an buaipui ve mek bawk. He bill-ah hian judge ruat chungchangah te, dan leh hrai lama thutlukna siamna kawngah court thuneihna tinepin, Parliament member-te kutah thuneihna sang zawk pek tum a ni. He bill ruahmanna hian Israel ram chhung hmun hrang hrangah dodalna a tawk nasa hle a, hun rei tak chu khawpui hrang hrangah duh lohna lantirin nawrh huaihawt a ni tawh. Eptute chuan bill hian sorkar laite chu thuneihna nasa zawk a pek dawn avanga an duh loh thu an au chhuahpui.