August 9-ah Pakistan Parliament ṭhiah a ni ang : PM Sharif

Pakistan prime minister Shahbaz Sharif chuan an ram inthlanpui neih tura inbuatsaihna atan parliament, National Assembly chu August 9 hian ṭhiah a ni dawn a, caretaker government kutah thuneihna dah a ni dawn tih a sawi.

PM Sharif hian Ningani khan Parliament member-te puala zanriah an kilho hnuah, hruaitute meeting a neihpui a ni. An ram politics dinhmun tawn mekte sawihoin, caretaker prime minister ruat chungchangte pawh an ngaihtuah nghal bawk.

Sharif hian August 9 hian President chu Parliament ṭhiat turin thurawn a pe dawn a, President hian darkar 48 chhungin a ṭhiat ve nghal ang. President hian chhan dang avangin PM thurawn hi kaltlangpui lo mah se, Assembly hi automatic-in ṭhiah a ni zui dawn tho a ni.

Sharif chuan caretaker prime minister ruat tur chungchang chu eptu party hrang hrang pawh a sawipui dawn tih sawi langin, thutlukna an siam hnuah an candidate thlan hming chu President hnenah a theh lut dawn a ni. Mahse eptute nen candidate chungchangah inremna an siam thei lo a nih chuan, Election Commission for Pakistan (ECP) kutah mawhphurhna pein ECP hian rawtna an theh luh hrang hrang aṭangin candidate tur hi a lo thlang ve thung ang.

National Assembly term hi August 12 hian a tawp dawn a, term tawp hmain ṭhiah a ni dawn a ni.