Pakistan PM hlui Imran Khan kum 3 tang turin hrem

Pakistan prime minister hlui, Pakistan Tehreek-e-Insaf (PTI) hotu, Imran Khan chu a sum lak luh zat dik lo taka report a pek avangin Inrinni khan a chungthu ngaihtuahtu, judge Humayun Dilawar chuan thiam loh chantirin kum thum tang turin a hrem. Imran Khan hi Inrinni vek khan Lahore-a a chenna inah man nghal a ni.

Prime Minister a nihna aṭanga ban a nih hnua, Imran Khan lakah hian thubuai 100 chuang theh luh a ni a, tuna thiam loh chantir a nihna thubuai erawh hi chu PM a nih laia thilpek a dawnte a hralhna aṭanga a sum hmuh zat a zep ṭhen vang a ni. Heng thilpek a dawn, a hralh leh takte hi dollar 635,000 man chuang nia hriat a ni. Mahse Imran Khan hian dik lo taka puh a ni tih sawiin, politcis-a amah dotute thiltih niin a sawi a, a thubuai chu ngaihtuah ṭhat leh tura dilna a la siam leh tur thu hi a sawi.

Man a nih hma hian Khan hian amah ṭantute hnenah thuchah a siam a, Pakistan-a rorel lai sorkar thil tihdan chu do let turin a fuih."Thil pakhat chiah ka ngen duh che u, inah ngawi rengin lo ṭhu mai mai suh u. In tan leh kan ram tan ka tuar mek a, in fate hmakhua atan ka tuar bawk hi," tiin video statement a lo buatsaih a ni.

Imran Khan hi court-a a inlan duh loh avangin May thla khan man a lo ni tawh a, mahse, man a nih dan chu dan dik lo a ni an tih avangin chhuah leh rih a ni. Hemi hnu hian man a nih lohna turin Khan leh amah thlawptute hian Pakistan hmun hrang hrangah nawrh huaihawtin buaina an siam fo a, PTI party-a an hotu eng emaw zat pawh buaina siama puh an nih avangin man an lo ni tawh bawk.

Thiam loh chantir a nih chungchangah hian Khan-a lawyer, Intazar Hussain Panjutha chuan thubuai ngaihtuah a nih dan chu 'Kangraoo-type court' tiin, a chungthu an ngaihtuaha hi insawifiahna hun pek a ni lo, a ti. He thutlukna avang hian Khan hi kum nga chhung politics-ah a inhnamhnawih thei dawn lo a ni. Court sang zawka a thubuai ngaihtuah ṭha tura an thlen hunah thiam chantir ngei a nih a beisei thu a sawi.

Imran Khan hi Punjab province-a Attock jail-ah dah a ni a, hei hi Pakistan khawpui, Islamabad aṭanga km 85 vela hlaa awm a ni. He tan inah hian Imran Khan-a party member zinga mi eng emaw zat an tang mek nia sawi a ni.