Slovenia ramin tuilian tuar mek

Slovenia ram chuan ruah sur nasa tak avangin tuilian a tuar mek a, tuilian avanga chhiatna thlengah mi pathum an thi tawh a, kawngpui, lei leh in tam tak a chhe tawh bawk.

Prime minister Robert Golob chuan an ram chanchina leilung chhiatna an tawrh nasawt ber a nih thu sawiin, tuilianin thil a tihchhiat chu USD mtd 550 hu a tling tawh tih a sawi.

PM hian Inrinni liam ta khan chhiatna kaihhnawihah National Security Council meeting a ko a, an ram hmun thuma ṭhena hmun hnih chu tuilian hian a tibuai mek tih a sawi. Kawngpui leh energy infrastructure lamte a nghawng zual a, mi sang tel chuan an chenna in chhuah san an ngai a, mi tam tak chu lawng leh helicopter hmanga hruai chhuah an nih thu a sawi bawk.

Europe ram hrang hrangte chuan khaw lum lutuk, tuilian leh leimin nasa takte an tuar. Inrinni kha Slovenia ṭhenawm, Austria-ah pawh tuilian an tuar a, mi 80 vel chu an chenna in an chhuah san. Georgia ramah pawh leimin vangin mi 16 an thi a, chin hriat lohin mi eng emaw zat an la awm. Serbia ramah chuan thla hmasa khan thlipui tleh vangin mi pathum an thi a ni.