Donald Trump leh a nupuiin Covid-19 an kai

US president Donald Trump leh a nupui first lady, Melania Trump chuan nimin (anni huna Ningani zan) khan Covid-19 an kai tih an twitter-ah an tarlang ve ve.

Trump leh Melania hian an in lama an in quarantine nghal thu an tarlang a, tih tur pawimawh an neih zawng zawngte pawh an ṭhulh lailawk tih an puang bawk. An dinhmun chu ngaihtuah awm a nih loh thu leh an ṭhat chhuah leh vat an rin thu pawh an tarlang bawk a ni.

A hmain Trump chuan a nupui nen Covid-19 test an neih thu a lo sawi tawh a, a top adviser Hope Hicks chuan Covid-19 a kai tih hriat chhuah a nih avangin anni nupa hian test hi an nei ve nghal a ni. Hicks hi Trump adviser a nihna angin Trump zinnaah a ṭawiawm fo a, Nilainia US presidential candidate pahnih Trump leh Joe Biden-in debate an neihnaah pawh khan Hicks hian Trump a zui a ni.

US President thar thlanna atan ni 30 chuang hret chauh hun a awm tawh a, candidate-te pawh an campaign ngawrh tawh hle. Mahse Republican presidential candidate Trump hian Covid-19 a kai tak avangin  hun eng emaw chen chu campaign chhunzawm thei loin a inkhung ve phawt a ngai dawn a ni. Eng chen nge inkhunghran a ngaih dawn erawh sawi chiang lo mah se, White House chuan a programme neih hnaivai ho chu a ṭhulh a, hemi zingah hian Florida-a campaign tura zin a tumna pawh a tel. 

Johns Hopkins University tarlan dan chuan US-a Covid-19 hri kai hi mi 72,77,352 an awm tawh a, heng zinga mi 47,36,621 chu enkawl dam tawh niin, he hri thihpui hi mi 2,07,791 an tling tawh a ni. US chu khawvela Covid-19 hri kai tamna ber leh he hri vanga thi tam berna ram a la ni.