China-in naupangte smartphone khawih theih chin bithliah tum

China internet watchdog, Cyberspace Administration of China (CAC) chuan an rama naupangten smartphone hmanga internet service an hman theih hun bithliah sak a tum. Hei hian social media platform hrang hrang a nghawng rin a ni.

Draft guideline an siam chu kar liam ta khan tichhuakin,hetah hian naupang kum tlinglote chu zan dar 10 aṭanga zing dar 6 inkarah internet service an hman khapsak a rawt a,hei bakah hian kum 16-18 inkarte pawh ni khatah internet hi darkar hnih chin chauh hman tir turin a rawt bawk.

Naupang kum 8-15 inkarte chu ni khatah darkar leh, kum 8 hnuai lamte chu ni khatah minute 40 chauh smartphone hmanga internet hman phalsak turin a ti. Hemi rual hian apps leh platform ṭhenkhat, naupangte taksa leh rilru lam tihhmasawnna tura pui theite erawh chu he khapna hian a huam dawn lo tih a sawi a, mahse engte nge ngaihnathiam turte erawh a la sawilang lo thung.

China ramah hian ṭhalai leh kum naupang zawk zingah internet ngawlvei an tam avangin heng khuahkhirhnate hi siam a tum a ni. Kum 2019 khan naupangten online game an khelh theih hun chu minute 90 chinah bithliah sak an ni a, kum 2021-ah darkat khatah tihtlem leh a ni bawk.

CAC chuan draft guideline a siam chungchangah September 2 thleng mipuite ngaihdan a dawng thei tih a sawi. Dan thar hman hun tur hi sawi la ni lo.