China holiday-a Nawrh huaihawt mi 86 man

Hong Kong police-te chuan Ningani khan China National Day-a nawrh huaihawt, democracy thlawptu mi 86 an man. 

Police-te chuan an mi mante hi phalna nei loa pungkhawmin, ṭum eng emaw zat kal darh tura an hriattir hnuah thu an zawm duh loh avangin an man tih an sawi. Man zingah hian district councillor pali an tel. 

Ningania nawrh huaihawt tur hian online hmanga thehdarh a ni a, Hong Kong-a Causeway Bay shopping district-ah mi tam tak kal khawmin, police ṭhiah an duh thu te, democracy rorelna tundin an duh thute an aupui a ni. Hong Kong sorkarin sorkar laka helna rilru chawk chhuak thei nia puha auhla atana hman a lo khap tawh, 'Liberate Hong Kong, Revolution of our time' tih chu mipui pungkhawmte hian an au chhuahpui a ni. 

People's Republic of China din champha, National Day hi Hong Kong-ah chuan China sorkar laka lungawi lohna lantirna atan hman a ni fo ṭhin. Nikum aṭang khan Hong Kong leh mainland China sorkar rorel dan chungchangah lungawi lohna lantir hi a hluar chho hle a, hei vang hian China chuan Hong Kong-a sorkar dodal zawnga che ṭhinte beih let nan national security law thar siamin, kumin June 30 aṭang khan hman ṭan a ni. He dan thar hi Hong Kong mipuite bakah, ram hrang hrangten nasa takin an sawisel a, Hong Kong mipuite zalenna rahbeh tumnaah an ngai. He dan thar vang hian US chuan Hong Kong leh China-a sorkar official-te hrekna a siam phah hial a ni.