US palaiin Niger ram a tlawh

US acting deputy secretary of state, Victoria Nuland chuan Thawhṭanni khan Niger ram a tlawh a, president Mohamed Bazoum leh a kaihhruai sorkar paih thlatu, sipai hotute a kawm.

Victoria Nuland chuan sipai hotu, chief of staff atana ruat thar, Moussa Saloau Barmou leh a colonel pathumte chu Niger khawpui, Niame-ah a kawm a, an rama democracy tungding leh thuai turin a nawr. Nuland hi July 26-a Niger sipaite'n an ram President an paih thlak hnua US official zin hmasa ber a ni.

US palai hian President Bazoum leh amah paih thlatu, sipai hotu lu ber leh Niger ram hruaitua inpuang, general Adbourahmane Tiani hmuh a dilna erawh chu hnawlsak a ni a, a hmu thei ta lo tih a sawi.

US State Department chuan Niger President Bazoum chu telephone-a an biakpawh tawh thu leh, sipai hotute hnenah pawh President hi a dinhmun ngaia dah let leh thuai tura an lo nawr tawh thu an sawi a ni.

West Africa ram 15 intel khawm, ECOWAS chuan Niger sipaite hi President Bazoum thuneihna pe let leh tura vauin hun tiam a siamsak a, hun tiam chhunga an chet loh chuan sipai chakna pawh hman mai theih a nih thuin a lo vau tawh. Mahse an hun pek hi Pathianni zan khan a tawp a, Niger sipaite chuan an thu zawm loin, a ram airspace-te an khar zui zawk a ni. ECOWAS hian lo vau tawh mah se, sipaite erawh a chettir mai dawn lo nia sawi a ni a, inremna zawnga inbiakpui dan ngaihtuah a tum. Kar liam ta khan Ningani khan ECOWAS palaite hi Niger-ah hian an kal a, mahse, President Bazoum leh sipai hotu Tiani pawh hmu loin, zan pawh riak lohin an kir leh nghal a ni.

Niger ṭhenawm ram - Algeria, Mali leh Burkina Faso-te chuan ECOWAS sipaite inrawlhtir chu an duh loh thu an sawi nghal a, ECOWAS aṭanga suspend mek, Mali leh Burkina Faso chuan ṭangrual pawl sipaite inrawlh chu indo puanna ang tluk a ni dawn tih an sawi. Heng ram pahnihte hian Niger mipuite an thlawpna lantirin, official-te pawh an lo tir tawh bawk.