Pakistan PM hlui Imran Khan tanna hmun a hrehawm

Pakistan prime minister hlui Imran Khan chu eiruk thubuaia thiam loh chantir a nih hnuah man a ni a, Punjab province jail-ah tantir a ni.

Imran Khan-a attorney, Naeem Haider Panjotha chuan Thawhṭanni khan kum 70 mi, Pakistan Tehreek-e-Insaf (PTI) chairman hi a tannna hmunah hmuin, tan inah hian C-facility pek a ni a, a tanna cell chu a te in, tho leh rannung dangin an bawm nasa hle tih a sawi. Hemi rual hian PTI chairman hian a dam chhung jail-a hmang tur pawhin a inhuam thu a lo hrilh tih a sawi bawk.

Panjotha chuan court-in Imran Khan thiam loh chantir a, manna tur thupek a tihchhuah hnuah, Inrinni liam ta khan police-te chuan arrest warrant pawh engmah entir loin, Lahore-a a chenna in chu an luhchilh nghal niin a sawi.

Khan hi Prime Minister a nih laia PM a nih anga thilpek a dawn, USD 4,97,500 hu chu dan loa a mimal tana hralhah puhin thiam loh chantir a ni. Court chuan kum thum tang turin a hrem a, Inrinni khan man nghal a ni bawk. Hei hi thla thum chhunga Imran Khan-a'n man a tawh ṭum hnihna a ni. May 9 khan Al-Qadir Trust corruption case vangin Islamabad-a court compound aṭangin man a lo ni tawh bawk.

No-confidence vote hmanga nikuma Prime Minister a nihna aṭanga paih thlak a nih hnuah, Imran Khan hian thubuai 140 chuang a nei tawh a, heng zingah hian firfiak zawnga chetna, sakhaw sawi chhiat, eiruk leh tualthata puhnate pawh a tel.