WW II bomb hmuh avangin mi 13,000 insawn chhuak

Germany rama Dusseldorf khuaah Indopui II-na hunlaia mi bomb chhar a nih avangin, he khuaa cheng mi 13,000-te chu fimkhur thilah insawn chhuak rih tura hriattir an ni.

One-tonne shell bomb hi Thawhṭanni khan city zoo bulah hmuh a ni a, police leh bomb squad-te chuan he bomb sut dan tur hi an buaipui mek a ni. Thuneitute chuan bomb hmuhna aṭanga metre 500 bial huam chhunga chengte chu insawn chhuak tura hriattirin, he hmun hi mipuite tlawh theih loh tura khar nghal a ni bawk.

Germany ramah hian Indopui II hunlaia bomb hnut chhhiah, hmuh chhuah loha inphum tam tak a la awm nia sawi a ni.

Kum 2017 khan Frankfurt-ah 1.4 tonne bomb hmuh a nih avangin, a chhehvela cheng mi 65,000 te pawh hmun dangah sawn chhuah lailawk an ni tawh. Kum 2021 December thla khan Munich station bula in saknaah Indopui II hunlaia mi bawk bomb pakhat a puak a, mi pali an hliam.

Smithsonian Magazine-in a tarlan danin, kum 1940-1946 inkar khan US leh British air force-te chuan Europe-ah bomb ton mtd 2.7 zet an thlak a, heng zinga a zahve vel chu Germany ramah thlak a ni.