Kum 5 chhung politics khel thei lo turin Imran Khan hrem

Pakistan election commission chuan an ram prime minister hlui, Imran Khan chu Toshakhana corruption case-a thiam loh chantir a nih hnuah, kum nga chhung politics khel thei lo turin a hrem zui ve leh.

Pakistan ram danah hian thiam loh chantir tawhte chu ECP hian kum nga thleng politics khel thei lo turin a hrem thei a ni.

Kar liam ta Inrinni khan Islamabad trial court chuan kum 70 mi, Imran Khan hi PM a nih lai, kum 2018-2022-ah Prime Minister a nihna avanga thilpek a dawnte a mimal tana dik lo taka hralha puhna thubuaiah thiam loh a chantir a, kum thum tang tura hrem a nih hnuah Lahore-a a chenna in aṭangin man a ni a, Attock Jail-ah a tang mek a ni. Imran Khan-a'n a thilpek dawn a hralh hlut zawng hi USD 6,35,000 chuang hu niin an sawi.

Thiam loh chantir a nih chungchangah nimin khan Khan-a lawyer chuan Islamabad High Court-ah petition a theh lut a, nimin vek khan chief justice Aamer Farooq leh justice Tariq Mehmood Jahangiri awmna bench chuan a ngaihtuah nghal ang.

Pakistan sorkarin kum 1974-a a din, Toshakahana hi cabinet divison hnuaia department niin, anni hian an ram hruaitu, parliament member, bureaucrats leh official-te'n ram dang sorkar hnen aṭanga thilpek an dawnte a enkawl a ni. Imran Khan hi PM a nih laia ram dang aṭanga a thilpek dawn eng emaw zat chu department-ah hian pe lut loin a zep a, hengte hi a hnuah a hralh nia puh a ni.

Toshakahana case chungchanga Imran Khan thiam loh chantir a nih hnuah, Pakistan prime minister Shehbaz Sharif chuan national treasure-ah thilpek dawn an dah khawmte chu lilam vek a ni dawn tih a sawi. An lilamna aṭanga sum hmuhte chu an rama dinhmun harsa leh rethei zawkte ṭanpuina turin hman vek a ni ang, a ti.