Brazil-ah Amazon Summit hmang

Amazon Cooperation Treaty Organization (ACTO) chuan Brazil-a Belem khawpuiah ni hnih awh, Amazon summit chu Thawhlehni leh nimin khan an nei.

ACTO-ah hian member ram pariat - Bolivia, Brazil, Colombia, Ecuador, Guyana, Peru, Suriname leh Venezuela an awm a, Amazon ramngaw chereu zel venna tur leh, hma lak dan turte an sawiho a ni.

Summit neih hma hian Brazil president Luiz Inacio Lula da Silva chuan kum 2030-ah chuan Amazon ramngaw tihchereu ṭhin chu tihtawp theih a lo tiam tawh a ni. Lula chuan a thlak tak, Brazil president hlui Jair Bolsonaro hnuaiah kum tam tak chu ram ngaw hi nasa taka tihchereu leh enkawl lohin a awm niin a sawi. Tun ṭum an meeting chu Amazon venhimna tura ke pen thar lehna tur pawimawh tak a nih thu a sawi a ni.

Amazon rainforest hi India ram let zeta zau niin, ram pariat leh territory pakhatah a inpharh a, he ram ngaw hmun thuma ṭhena hmun hnih hi Brazil ram chhungah a awm. Monitoring of the Andean Amazon Pact chuan ram ngaw tihchereu a nih zel avangin Amazon ram ngaw hi a tira mi aiin sq. km. 85,000 (a pumpui aṭanga 13%) vel zetin a zim tawh niin a tarlang.

Summit neih hma hian environmental group 50 chuang chuan Amazon chereu zel tur veng a, humhalhna tur ruahmanna fel tak siam turin sorkar hrang hrangte chu an ngen.