Beijing tuilian avanga thi mi 33 tling tawh

China khawpui, Beijing leh a chhehvelah ruah sur nasa tak avangin tui a lian a, tuilian leh chhiatna dang thleng avanga thi hi mi 33 an tling tawh a, an zingah hian chhanchhuah hna thawktu mi panga an tel. Chin hriat lohin mi 18 an awm mek tih nimin khan official-te chuan an sawi bawk.

Tun hnaiah Beijing-ah hian ruah sur nasin infrastructure-te a tichhe nual a, khawpui chhung leh a chhehvel chu tui tlingin a tibuai hle bawk a ni.

City government chuan tuilian vang hian chenna in 59,000 a chhe tawh a, thlai chinna ram hectare 15,000 chuanga zau a chim tawh bawk tih a sawi. Kawng tam tak a chhia a, lei chhia pawh 100 a tling niin Bejing vice mayor, Xia Linmao chuan nimina press conference a neihah a sawi.

China ram hmun dang, a bikin hmar lam bial pawhin July thla tawp lam aṭanga ruah nasa taka a sur chhunzawm reng avangin tuilian an tuar mek bawk. Hebei province-ah chuan tuilian avangin mi 15 an thi tawh a, chin hriat lohin mi 22 an awm mek. Jilin-ah mi 14 an thi tawh bawk.

Hetih lai hian China ram hmun ṭhenkhatah chuan khaw lum lutuk an tuar mek thung.