Russia-in armed drone 2 kap thla

Russia air defence chuan an ram khawpui, Moscow pana armed drone pahnih thlawk chu an kap thla tih an sawi.

Moscow mayor Sergei Sobyanin chuan nimin zing khan drone pakhat zawk hi Moscow chhim lam khawdai, Domodedovo area-ah kah thlak a ni a, pakhat dang hi khawpui khawthlang lam, Minsk high-way area-ah kah thlak a ni tih a sawi.

Russia sorkar enkawl, TASS news agency pawhin drone pahnih kah thlak an nih thu sawiin, heng drone-te hi Ukraine-in Moscow beihna atana a kah chhuah niin a tarlang.

Pathianni khan Moscow khawdai, Podolsky district-ah Ukraine drone kah thlak a lo ni tawh bawk a, kar liam ta khan Moscow aṭanga km 200 vel, Kaluga bulah drone pasarih kah thlak a ni bawk tih defence ministry chuan a sawi.

Ukraine president Volodymyr Zelensky chuan July 30 khan Russia-ah indona chu an kalpui dawn tih sawiin, an ram hmun pawimawh leh sipai hmunte chu an bitum tur thu a lo sawi tawh a ni.