Ecuador Presidential candidate kap hlum; Ram pumah ni 60 chhung emergency puang

Ecuador President thlanna neih tura candidate pakhat, Fernando Villavicencio chu Nilaini khan an ram khawpui, Quito-a a campaign-naah silaia kah hlum a ni.

He thil thleng avang hian president kal chhuak tur, Guillermo Lasso chuan ram pumah ni 60 chhung atan state of emergency a puang nghal.

August 20-a President thar thlanna neih turah hian candidate pariat an awm a, kum 59 mi Villavicencio hi Build Ecuador Movement candidate a ni. Villavicencio hi eirukna dotu leh sawiseltu langsar tak niin, a bikin kum 2007-2017 inkara president hlui, Rafael Correa kaihhruai sorkara eirukna thlengte a sawisel nasa hle. Sorkar official eng emaw zat leh, President hlui Correa lakah ngei pawh complaint tam tak a lo theh lut tawh a ni.

Villavicencio-a campaign adviser, Patricio Zuquilanda chuan candidate hian a hmain vauna pawh a lo tawk tawh a, thuneitute hnenah thlenin mi pakhat man a lo ni tawh tih a sawi. An rama tharum thawhna leh, ruihhlo tawlhruk hluar zel chu tihtawp a nih theihna tura hma lakpui turin ram dang hruaitute pawh a lo ngen ṭhin tawh a ni, a ti.

President Lasso chuan ram mipuite hnenah thuchah tichhuakin, Villavicencio kah hlum a ni chuan a ṭhawngin, he thil thleng hian a thin a tiur hle tih a sawi a, a nupui fanaute a tawrhpui thu a sawi bawk. Pawikhawihtute chu hrem lohin an chhuak dawn lo tih sawiin, mipuite himna leh August 20-a inthlanna felfai taka neih a nih theihna turin sipaite chuan ram pumah venhim hna thawkin theihtawp an chhuah tih President chuan a sawi a ni.

Pawikhawihna thleng kaihhnawihah hian mi paruk an man tawh tih police-te chuan an sawi.

Social media lama video darhah, Villavicencio hi an hun hmanna aṭanga a kal chhuak, motor-a a lut tur chu silai hian kah a ni. Police-te chuan a bul vela awm mi ṭhenkhat pawh an hliam tih an sawi bawk.