Kim Jong-un-a'n sipai hotu a ban

North Korea ram hotu lu ber, Kim Jong-un chuan a sipai hotu lu, chief of general staff Pak Su Il a ban a, a aiah vice marshal Ri Yong Gil a dah. Sipai hotu a banna chhan hi sawi lan a ni lo.

Nilaini khan an ram khawpui, Pyongyang-ah rorel lai party, Workers' Party central military commission meeting neih a ni a, Kim chuan a sipai hotu lu ber a thlak thu hi a puang. Meeting-a telte chu indo hmachhawn thei tura inpuahchah ṭhat a ṭul thute sawiin, ralthuam siam pawh tihphuisui leh, drill pawh tam zawk neih a ṭul thute a sawi.

Korean Central News Agency chuan meeting neih hma hian Kim hian ralthuam siamna factory-te a tlawh tih a sawi bawk.

Chief of general staff aṭanga ban tak, Pak Su Il hi nikum kum tawp lamah a post-ah hian dah a ni a, mahse, sipaite hmalakna kawngah Kim duh dan anga a chet chak tawk loh avanga thlak ta nia rin a ni. Sejong Institute-a researcher, Cheong Seong-chang chuan Kim Jong-un hian official-te chu an hnaah an chak tawk lo nia a ngaih chuan rang takin a thlak mai zel niin a sawi. A thlaktu atana a dah, Ri hi a hma pawhin chief of staff-ah hian hun rei tak a lo awm tawh a ni.

South Korea leh USA sipaite chuan tun thla tawp lam hian joint drill an nei leh dawn a, hei hi NKorea chuan a ngaimawh leh tawh hle a ni. Meeting-ah pawh sipaite hma lak dan turte Kim hian a sawipui a ni. Hei bakah September 9 hian North Korea ram din champha vawi 75-na lawmna atan, parade lian tham buatsaih a ni leh dawn a, hemi chungchang hi meeting-ah hian sawiho a ni bawk.