Pakistan President-in Parliament a ṭhiat

Pakistan president Arif Alvi chuan prime minister kal chhuak tur, Shehbaz Sharif thurawn angin, nimin khan an ram parliament, National Assembly chu a ṭhiat ta.

PM Sharif kaihhruai sorkar lai term titawpin, inthlanpui neihna tura inbuatsaihna atan President hian Parliament hi Constitution-a Article 58 hnuaiah a ṭhiat ta tih thuchhuah chuan a tarlang.

Nilaini khan PM Sharif hian Preisdent Alvi hnenah an sorkar term a tawp hma ni thumah Parliament hi ṭhiat tura ngenna a lo thlen tawh a ni. Nilaini zanlai khan President chuan a ṭhiat zui ta nghal a ni.

Sorkar term tawp hmaa Parliament ṭhiah a nih avangin, Election Commission of Pakistan (ECP) chuan ṭhiah a nih aṭanga ni 90 chhungin inthlan a buatsaih a ngai dawn a ni. Sorkar hian a term a hman zawh chuan, term zawh aṭanga ni 60 chhunga inthlan buatsaih ngei a ngei thung.

Parliament ṭhiah a nih tak avangin caretaker prime minister ruat tur pawh buaipui nghal a ni a, Prime Minister leh National Assembly-a Leader of Opposition, Raja Riaz-te chuan interim PM tur hi an ngaihtuah dawn a, ni thum chhunga an inrem theih loh chuan parliamentary committee-in a ruat ang.