Hawaii ram kang avangin mi 36 an thi

Hawaii, US-a Big Island leh Maui-ah ram kang nasa tak thleng avangin mi 36 an thi a, mi eng emaw zat hliam bawkin in 271 vel a kang chhe bawk.

Thawhlehni aṭang khan Maui-ah hian hmun thumah ram hi a kang ṭan a, thli na tak a tleh tel avangin a kangkai chak hle. Mi tam tak chu hmun him lamah sawn chhuah nghal niin, state of emergency puan a ni zui bawk.

Hawaii governor Josh Green chuan Maui-a tourist leh economic hub, Lahaina khua chu kangmei hian a tichhe nasa hle tih sawiin, hetianga chhiatna rapthlak hi an la tawng ngai lo tih an sawi.

President Joe Biden chuan ram kang ṭhelhna kawnga pui turin sorkar chu a theih ang anga che chhuak turin a hriattir tih a sawi a, harsatna tawkte chhanchhuah hna thawk turin Coast Guard leh Navy-te pawh an thawk chhuak tawh tih a sawi. Marines lam pawhin kangmei ṭhelhna turin Black Hawk helicopter an thawh chhuahpui bawk. Hawaii National Guard chuan Chinook helicopter hmangin kangmei ṭhelh hna leh, chhanchhuah hna an thawk mek bawk a ni.