Hawaii ram kanga avanga thi mi 55 tling tawh

Hawaii ram kang avanga thi chu nimin thleng khan mi 55 an tling tawh a, Maui island-ah chin hriat lohin mi 1,000 vel an awm bawk.

Governor Josh Green chuan Hawaiin state-in chhiatna a tawn tawha rapathlak ber a ni tih sawiin Maui island khawthlang lam, tuipui kama Lahaina khua chu 80% vel a kang chhia tih a sawi. Lahain khuaa awm, US-a thingkung lian ber, kum 150-a upa Banyan kung pawh a kang tel a ni. He thingkung hi meter 18 vel zeta zau a inzarpharh tawh a ni, feet 60 chuanga sang a ni.

Governor Green chuan ram kang hian building 1,700 chuang a kang chhe tawh tih sawiin, a thil tihchhiat hi USD tluklehdingawn tam tak hu a ni tawh a, Lahaina khaw din thar leh tur chuan kum tam tak a ngai dawn a ni, a ti. Chenna in chante awmna tur pawh ruahman mek a nih thu a sawi bawk.

US president Joe Biden chuan ram kang avang hian Maui island-ah ' major disaster' a puang a, hemi hmang hian sorkar laipui aṭangin chhawmdawlna leh ṭanpuina tur fund-te pek chhuah a ni.

Ram kang hi Hawaiian Kingdom khawpui ni ṭhin, Lahaina khaw dai aṭangin Thawhlehni khan chhuak ṭanin, thli chak tak a tleh tel avangin hmun hrang hrangah a kangkai chak hle. Nimin thleng khan kangṭhelhtu pawlte chuan a ṭhelh hna hi an thawk chhunzawm a, 70% vel chu an ṭhelh mit thei tawh niin an sawi.

Hawaii ram kang hi kum 2018-a California state-a ram kang nasa tak, mi 85 an thih phahna Camp Fire a thlen hnua US-a ram kang nasa ber a ni.