Russia-in kum 50 dawn hnuah moon mission kalpui

Russia chuan kum 50 dawn hnua a vawi khatna turin moon mission a kalpui leh ṭan a, nimin khan thla leilung zir chiang turin rocket a kap chhuak.

Kum 1976 hnua a vawi khatna turin, European Space Agency puihna tel loin Russia chuan Lunar-25 craft hi nimin khan a kap chhuak a ni. Russia-in Ukraine a run hnuah European Space Agency hian Russia a thawhpuina hi a lo titawp tawh a ni.

Moscow time-a zing dar 2:10-ah Far East-a Vostochny Cosmodrome aṭangin Luna-25 moon lander hi kah chhuah a ni a, kg 800-a rit niin ni nga hnuah thla her kualna kawng thlengin, August 23 hian thla leilungah ṭum hman turin an beisei.

Khawvel ram hrang hrang zingah thla leilung zir chianna, moon mission hi ram pathum chauhin an la hlawhtlinpui thei a, Soviet Union,US leh China an ni. Russia bakah India chuan thla chhim lama ṭum thei hmasa ber nih an tum mek a, India hian July 14-a space craft a kah chhuah chu August 23 vek hian thla leilung chhim lamah ṭumtir a lo tum ve bawk a ni.

Russia space agency, Roscosmos chuan ram dang hmuhah Russia chuan thlaah an inkapkai thei tih lantir a tum tih a sawi. Russian space analyst, Vitaly Egorov chuan thla leilung zir chian chu an tum ber a ni lo tih sawiin, superpower ram pahnih - China leh US bakah, space superpower nih tum ram dangte an elna a ni, a ti.