Hawaii ram kanga avanga thi pun belh zel

US-a Hawaii state-a ram kang avanga thi chu an pun belh zel a, Inrinni liam ta thleng khan chhiatna thleng avanga thi hi mi 89 an tling tawh. Thuneitute chuan kum 100 chhunga US-a ram kang avanga thi an tamna ber a ni tih an sawi.

Ram kang ṭhelh hna hi ngawrh taka thawh chhunzawm reng a ni a, heti chung hian Maui thliarkarah chuan hmun hnihah a la kang chhunzawm a, Zirtawpni zan khan Maui khawthlang lam tuipui kam, Kaanapali-ah kang mei chhuak thar a awm leh bawk.

Official-te chuan kangmei tuar nasa ber, Maui thliarkara resort town, Lahaina khuaah in, hotel leh restaurant tam zawk chu meivapah an chang tawh tih an sawi. Chin hriat lohin mi eng emaw zat an la awm avangin, chhiatna thleng avanga thi zat pawh hi an la pun chhoh mai theih a rinawm thu an sawi bawk.

Federal Emergency Management Agency (FEMA) chuan Lahaina khuaa structure 2,200 chuang chu kangmeiin a tichhia a, ram acre 2,100 chuanga zau a kang chhe bawk tih an sawi. Kangmei chhuakin thil a tihchhiat hlut zawng hi USD tld 5.5 vel niin an chhut.

Kar liam ta Thawhlehni aṭanga chhuak, Hawaii ram kang hi a kan ṭan dan tak hriat chian a la ni lo. Hetih lai hian US Forest Service chuan US-a ram kang thleng ṭhin zinga 85% dawn chu mihringte tihchhuah a ni tih a sawi. Kang mei hi Kula khua aṭanga chhuak ṭan a ni a, thli chak tak a tleh tel avangin hmun dang a kangkai chak hle a ni.