Ukraine-a beach ṭhenkhat hawn a ni

Ukraine-a Odesa chuan Inrinni liam ta aṭang khan hun rei tak an khar hnuah beach ṭhenkhat chu mipuite tlawh theihin a hawng a, hei hi Russia-in an ram a run hnua tuipui kama mipuite an awm khawm phalsak an nihna hmasa ber a ni.

Odesa hi Ukraine rama lawngchawlh hmun lian ber leh navy hmunpui a ni bawk. Nikum February thlaa Russia-in Ukraine ram a run aṭang khan missile leh drone hmangin he khawpui hi vawi tam tak beih a ni. Hei vang hian mipuite himna atan thuneitute chuan beach-te hi an khar a ni.

Governor Oleh Kiper chuan khawpui chhung civil leh sipai hotute'n an ngaihtuah hnuah, mipuite tlawh theih tura beach hawn hian an rel tih sawiin, zing dar 8 aṭanga zan dar 8 thleng hawn a ni tawh dawn tih a sawi. An hawn ni pawh hian tui cheng tura kal an tam nghal hle.

Tun hnaiah Ukraine hian drone hmangin Russia a beih ngawrh chho hle. Russia defence ministry chuan Inrinni khan Ukraine ram an luahsak, Crimea beihna tura Ukraine drone kah chhuah 20 chu an kap thla niin a sawi. Hemi hma hian ni thum chhung chu a zawnin Moscow khawpui beih tumtu drone an kah thlaksak tawh bawk niin an sawi. Russia hian Inrinni vek khan Ukraine khawchhak lam, Luhansk biala Urozhaine khua chu a la niin an sawi bawk.