Niger sipaite'n President Bazoum thubuai siamsak tum

Niger sorkar paih thlatu sipaite chuan President an paih thlak tak, Mohamed Bazoum chu ram phatsantu leh an ram himna ngaihthaha puhin thubuai siamsak a ni dawn tih an sawi. Hemi rual hian West Africa regional bloc, ECOWAS nena inbiakna nei tura an inhawn thu an sawi nghal bawk.

Pathianni zan khan sipai sorkar thupuangtu, Col. Maj. Amadou Abdramane chuan, President paih thlak tak thubuai siamsakna tur evidence hrang hrang pawh an la khawm tawh tih a sawi a ni.

Sipaite hian July 26 khan kum, 63 mi, President Bazoum hi paih thlain, an ram khawpui Niamey-a presidential compound-ah a nupui leh a fapa nen an hreng zui a ni.

Bazoum-a party chuan sipaite'n an hrenna hmunah hian electric supply titawpin, tui thianghlim leh ei tur pawh an nei tawh lo a, a fapa pawh a lung lam ṭha lo avangin doctor a hmuh a ngai tih an sawi. Mahse sipaite chuan hei hi thu dik lo a ni tih an sawi ve thung a, August 12 khan doctor pawhin a tlawh a, Bazoum leh a chhungte hriselna dinhmun pawh ngaihtuahawm an awm lo tih a sawi a ni, an ti. West African politician-te chu sipai sorkar hming tihchhiat tuma dik lo taka thu thehdarhah an puh bawk.

Ram hrang hrangte chuan President Bazoum chu chhuah a, a dinhmun ngaia dah leh turin Niger sipaite hian an nawr a ni. ECOWAS pawhin President dah let tura tiin sipai chakna hmanah te a vau a, mahse, a vauna hi Niger sipaite hian a zawm duh chuang lo a ni.