Kim Jong-un-a'n missile leh ralthuam tam zawk siam turin thu pe

North Korea ram hotu, Kim Jong-un chuan ralthuam an siamna hmun, factory pali tlawhin, missile leh ralthuam dang tam zawk siam chhuak turin a hraittir niin state media chuan a tarlang.

South Korea leh US sipaite'n joint drill an nei leh dawn a, North Korea hian drill an neih hi an ram beihna tura an inbuatsaihnaah a ngaih ṭhin avangin a ngaimawh hle. Kar liam ta Zirtawpni leh Inrinni khan Kim chuan ralthuam siamna hmunte hi tlawhin, ralthuam tam zawk siam tur hian a hrilh a ni.

Kum 2022 aṭang khan NKorea hian ṭum 100 chuang missile a en chhin tawh a, heng zinga tam tak chu US leh SKorea-in joint military exercise an neih vauna atana a kah chhuahte an ni. Tun thla tawp lama ram pahnihte'n joint drill an neih leh hunah pawh, NKorea hian ralthuam tam zawk a en chhin leh ngei rin a ni bawk.

Hetih lai hian US official-te chuan tun hnaiah Russia Defence Minister leh NKorea hruaitute inkawmnaah khan, Russia hnena ralthuam leitir chungchang an sawi dun ngei niin an ngai. July thla khan Russia defence minister Sergei Shoigu chuan NKorea hi a tlawh a ni. Hemi hma hian US chuan NKorea hian Russia hnenah Ukraine a donaa a hman tur ralthuam supply-ah alo puh tawh bawk a, mahse, hi Russia leh NKorea hian an pha ve ve thung.