Sri Lanka-in tourism aṭangin USD mtd 219 la lut

Sum lama harsatna tawk mek, Sri Lanka chuan July thla chhung khan an rama khualzin lutte aṭangin USD mtd 219 a la lut tih tourism official-te chuan an sawi a, hei hi Central Bank of Sri Lanka data aṭanga chhut a ni tih an sawi bawk.

Sri Lanka Tourism Development Authority (SLTDA) chairman Priantha Fernando chuan July thla chhung khan an ram tlawhtu khualzin 1,43,039 an awm tih a sawi. Kumin thla sarih chhungin tourism aṭanga an sum hmuh hi USD tld 1.09 a tling tih a sawi bawk. Nikum chhung zawnga tourism aṭanga an sum hmuh kha USD mtd 764.6 a ni.

August 1-10 chhungin khualzin tlawhtu 51,594 an awm leh tawh tih sawiin, kumina tourist an neih zat hi 8,00,000 an tling tawh a ni. Tourism industry chuan kum 2023 chhung hian khualzin mtd 2 hip luh theih an tum.