US-in Ukraine puihna tur USD mtd 200 hu thawn leh dawn

United States chuan Ukraine security lam puihna turin USD mtd 200 hu a thawn leh dawn. A thawn tur zingah hian air defence munition, artillery round leh mine-clearing equipment-te pawh a tel ang.

Ukraine president Volodymyr Zelenskyy chuan US-in ṭanpuina an pek leh dawn avangin lawmthu a sawi a, an pek turte hi an mamawh tak a nih thu a tarlang. US hian hmanrua a thawn turte hi kar reilote hnuah thawn chhuah theih beisei a ni.

US president Joe Biden kaihhruai sorkar chuan Congress hnenah Ukraine tan emergency defence aid-ah USD tld 13 pek belh tur leh, Ukraine mipuite chhawmdawlna tur USD tld 8 pek belh leh turin a ngen bawk.

President Biden leh national security team chuan Ukraine aṭanga Russia um chhuah an nih theihna turin US chuan a theih chhung chu Ukraine a puih tur thu an lo sawi fo tawh a ni.

Nimin, August 15 kha Russia-in Ukraine a run ni 538-na a ni. Nimin khan Russia chuan Ukraine hmarthlang lam, Volyn region chu missile hmangin a kap a, mi pathum an thi a, hliam eng emaw zat an awm bawk. Regional head Yuriy Pogliaiko chuan missile hian Lutsk khuaa industrial building a fuh tih a sawi. Hei bakah hian Lviv region-a building ṭhenkhat kah chhiat a ni bawk.

Ukraine chuan Thawhṭanni zana Lviv leh Volyn bial beihna atana Russia missile kah chhuah 28 zinga 16 chu an lo kap thla niin a sawi.