Pakistan caretaker PM Kakar la lut

Pakistan caretaker prime minister atan Baluchistan senator, Anwaar-ul-Haq Kakar chu Thawhṭanni khan lak luh a ni.

President Arif Alvi chuan an ram Independence Day lawmnaah Kakar hi rinawmna thu tiamtirin a la lut.

Prime minister kal chhuak, Shehbaz Sharif leh eptu hruaitu, Raza Riaz-te'n carataker PM tura an ruat hnuah, Kakar hian Pathianni khan a party, Baluchistan Awami Party hotu a nihna leh, senator a nihna aṭangin banna a theh luh nghal a ni.

PM thar hian a cabinet member turte a thlang dawn a, an ram inthlanpui neih hma chu sorkar hi a enkawl dawn a ni. Inthlan hi Parliament ṭhiah a nih aṭanga ni 90 chhunga buatsaih tura tih ni mah se, Sharif kaihhruai sorkar khan census thar a pawm avangin hemi zulzui hian Election Commission chuan constituency boundary thar a siam a ngai dawn a, hei vang hian inthlan neih hun tur pawh hi sawn hlat a nih a rinawm.

Election Commission chuan federal leh provincial constituency thar siamna tur hian hun eng chen nge a mamawh dawn a la sawi lo a, mahse thla ruk emaw, a aia rei emaw a ngaih rin a ni.

Inthanpui neih turah hian Imran Khan-a party, Tehreek-e-Insaf (PTI); Shehbaz Sharik kaihhruai Pakistan Mulsim League-Nawaz (PML-N) leh Bilawal Bhutto Zardari kaihhruai Pakistan People's Party (PPP) te chu inbei ber turte an ni. Mahse PTI hotu, Imran Khan hi eiruk thubuaiah thiam loh chantira jail tantir a nih hnuah, Election Commission chuan kum nga chhung politics khel thei lo tura a hrem avangin tun ṭum inthlanah hian a chuh ve thei dawn lo.