Rukru rual 50-te'n LA-a departmental store an rawk

US-a Los Angeles khawpuia Nordstrom department store, Westfield Topanga Shopping Center chu rukru rual 50 velin luh chilhin an rawk a, bungrua USD nuai 1 chuang hu an ru chhuak.

Rukru rualte hian Inrinni liam ta khan dawr hi an rawk a ni. An vai hian hoodie hain mask an vuah a, bear spray hmanga security guard-te an phuh hnuah dawr chhungah hian an lut a, bag leh thawmhnaw man to tak takte lain dawr bungruate an suasam zui bawk a, hemi hnu hian an tlanchhe zui a ni.

Los Angeles Police Department commander, Gissele Espinoza chuan misual rualte man chhuah ngei tum hian theihtawp an chhuah mek tih a sawi.

Thawhlehni liam tak khan Los Angeles-ah hian rukru rual chuan Glendale-a Yves Saint Laurent store an lo rawk tawh bawk. He dawr rawktu hi mi 30 vel niin, thawmhnaw USD nuai 3 hu vel an ru chhuak a, dawr aṭanga an chhuah hnuah motor hrang hrang hmangin an tlanbo a ni.