Niger sipaite Putin nena inbiakna nei turin inhawng

Niger-a elected president Mohamed Bazoum leh a kaihhruai sorkar paih thla a, thuneihna changtu sipaite chuan Russia president Vladimir Putin chu inbiakna neihpui turin an inhawng tih an sawi.

July 26-a sipai chakna hmanga President Bazoum paih thlak a nih hnuah, US leh Africa ram dangte chuan Niger sipaite hi President chu a dinhmun ngaia dah let leh thuai turin an nawr reng a ni.

Hetih lai hian sipaite'n prime minister atana an ruat thar, Ali Mahamane Lamine Zeine chuan, party hrang hrangte hnenah pawh inbe tura an inhawn thu hi an hriattir tih sawiin, hemi rual hian an ram inrelbawl danah ram dangte inrawlh lo tura an ngenna chu a la ngai reng tih a sawi.

Russia President Putin hian Thawhlehni khan Mali sipai hotu biain, an ṭhenawm Niger ram chungchangte a sawipui a ni. Khawthlang ramte chuan Russia hi a inrawlh chhoh hlauin an ngaihven nghal hle.

Sipaite'n thuneina an chan hnuah, Niger ramah hian Russia ram thlawptu lam pawh an pung chho hle nia sawi a ni. Sipai sorkar thlawptute hian an pun khawmna hmunah pawh Russia flag-te vaiin, an ram awptu hlui France an duh lohna thute an aupui a ni.

West Africa ram hrang hrang sipai hotute chu Ghana-ah inhmu khawmin, Niger rama sipaite inrawlhtir an nih dan tur chungchangte an sawiho. Hemi hma hian regional bloc, Economic Community of West African States (ECOWAS) chuan Bazoum chu Niger President-a dah let leh a nih loh chuan, a ṭul anga hma a, sipaite pawh tirhah Niger sipai sorkar hi an lo vau tawh a ni.