Thailand Court-in Move Forward party ngenna pawm lo

Thailand Cons­titutional Court chuan Move Forward Party party prime minister candidate nominate nawn lehna tur Parliament-in a dansakna titawp tura ngenna theh luh chu a pawmsak lo.

Move Forward Party hi Parliament-a seat ngah ber ni mah se, party malin sorkarna a siam thei lo a ni. PM candidate atana an nominate, Pita Limjaorenrat hi July thlaa vote lak thawh khatnaah a tlang zo lo a, a thawh hnihna atana nominate leh an tumna chu Parliament member-te'n an hnawl a ni.

Court chuan PM candidate nominate nawn leh tura ngenna theh luttu hi mi 20 vel niin, an zingah hian PM candidate pawh hi a tel lo tih a sawi. "Heng mite hian complaint theh lut tur hian dikna an nei lo," tiin a hnawl chhan a sawi.

Thailand-ah hian inthlanpui neih a nih hnuah sorkar thar siam thei an la awm lo a, thla nga chhung chu careataker government hnuaiah an awm tawh.

Pita Limjaorenrat nominate nawn leh tumna hnawl a nih tak avangin Parliament chuan party lian pahnihna, Pheu Thai Party-in PM atana an canditate, Srethha Thavisin chungchangah vote an la leh dawn a, vote lak hun tur erawh tihchian a la ni lo a, tun kar chhunga an lak rin a ni.

Thailand prime minister ni tur hian candidate chuan Parliament chamber pahnih, elected legislator 500 awmna House of Representative leh, member 250 awmna Senate-a majority vote a hmuh a ngai a ni. Senate member-te hi sipai sorkarin a ruatte an ni.

Pheu Thai party chuan an PM candidate chuan majority vote a hmuh ngei an rin thu an sawi.