Imran Khan-a bail pawhsei dilna hnawlsak

Pakistan khawpui, Islamabad-a district and sessions court chuan prime minister hlui, Pakistan Tehreek-e-Insaf (PTI) chairman, Imran Khan-a'n a thubuai parukah bail pawhsei a dilna chu a hnawlsak.

Judge Muhammad Sohail chuan Imran Khan chungchanga Supreme Court thupek siam avangin bail a dilna pawh hi pawhsei theih a ni lo tih a sawi. Kar liam ta khan anti-terrorism court chuan a thubuai dang pasariha interim bail a dilna chu a lo hnawlsak tawh bawk.

Imran Khan hi May 9 khan a party worker-te'n ram chhung hmun hrang hrangah buaina nasa tak siam a, sorkar hmun pawimawh leh sipai hmunte an beih tel avangin man a lo ni tawh a ni. He buaina chhuak kaihhnawihah hian PTI worker leh hruaitu dang eng emaw zat man an ni bawk a, sorkar lam chuan buaina chhuakah hian a bultumtu berah Imran Khan hi a puh a ni.

PM aṭanga paih thlak, Imran Khan hi Toshakhana case-ah thiam loh chantir a nih hnuin, tun thla tir lam khan man a ni a, Attoak Jail-ah a tang mek a ni. Man a nih hnuah Election Commission of Pakistan (ECP) chua kum nga chhung politics khel thei lo turin a hrem bawk.