Pakistan-ah Kristian biak-in suasam
Pakistan-a Punjab province-a Jaranwala khuaah Nilaini khan mipui thinrimin Kristian biak-in pahnih an hal a, biak-in dang an suasam bawk. Hei bakah hian Kristian sakhaw zuitu ṭhenkhatte in an halsak bawk a ni.
Jaranwala khuaa Kristian chhungkhaw 150 vel chenna colony pakhat bulah Muslim lehkhabu thianghlim, Quran lehkhabu phek ṭhenkhat pawhthler leh, a sawichhiatna ziah hnanna hmuh a nih aṭangin he buaina hi a chhuak a ni. Tualchhunga Muslim sakhaw hruaitu pakhat chuan an sakhua tihbawrhban sak nia sawiin mipuite a fuihpawrh a, buaina hi a chhuak zui ta a ni.
Quran phek pawhthler an hmuh hnuah Muslim mi eng emaw zat chu tiang nena thawk chhuakin, Salvation Army Churh leh Saint Paul Catholic Church beiin an hal zui. Kristian colony pawh hualin an bei tel bawk.
He thil thleng hi mi hrang hrangin an dem thu an sawi a, Minorities Alliance Pakistan chairman Akmal Bhatti chuan mipuite chu sakhaw tihbawrhban khapna dan chhuanlama hmanga pawisawi lo mi tam tak chenna in suasam a ni, a ti.
Punjab provincial police inspector Mohammed Naved chuan, Jaranwala-a buaina siamtute zingah mi 100 chuang chu man an ni tih a sawi. Hemi rual hian sakhaw tihbawrhban khapna dan hnuaiah Kristian pahnih lakah thubuai ziah a ni bawk. He dan hnuaiah hian thiam loh chantir te chu thi tura hremna pek theih an ni.
Pakistan ramah sakhaw tihbawrhban saka inpuhna chungchangah buaina a chhuak fo. Tun thla tir lam khan Balochistan province-a zirtirtu pakhat pawh a zirtirnaah Islam sakhaw sawisela puh a nih avangin thah a lo ni tawh a, February thla khan Quran phek tichhiaa puhin mipui thirmin mi pakhat chu an lo sawisa hlum tawh bawk a ni. Right group hrang hrangte chuan he dan hi mimal thila inhuatna phuba lakna remchangah hman a ni fo niin an sawi. Pakistan mipui 96% hi Muslim an ni.
US chuan Pakistan rama thil thleng hi a dem thu sawiin, mipui pungkhawmten Kristian biak-in leh chenna in an beih chungchang chu chhui chiang ngei turin a phut. US state department-a principal deputy spokesperson Vedant Patel chuan, eng kawng zawng pawha tharum thawhna leh invauna thlen chu pawm theih a ni lo tih sawiin, pakistan thuneitute chuan he thila mawphurhtute chu a chhui chhuah thuai an beisei tih a sawi.