Hawaii ram kang vanga thi 111 tling tawh

Hawaii, US-a Maui thliarkar ram kang nasa tak avanga thi chu mi 111 an tling tawh.

Ram kang vanga thi mi 106 zinga mi panga chauh hi tunge an nih hriat chian an la ni. Hawaii governor Josh Grenne chuan Nilaini zan thleng khan ram kanna hmun 38% vel chauh an la enfiah tih sawiin, thi zat pawh hi a la punchhoh a rinawm thu an sawi. Chin hriat loha awm hi mi 1,000 chuang an la awm a ni.

Maui police hotu John Pelletier chuan tunkar chhungin ram kanna hmun 85% - 90% vel an enfiah theih a beisei thu a sawi a, mi 185 awmna search-and-recovery team-te chuan ngawrh takin hna an thawk mek a ni, a ti.

Hawaii hi khawvela siren warning system nei tam ber zinga mi a, mahse an state-a ram kang nasa tak a thlen hian siren 80-te chu tih rik an ni lo. Hemi chungchangah hian zawhna leh sawiselna pawh an tawk a ni. Mahse Maui emergency management agency administrator, Herman Andaya chuan siren-te hi tsunami thleng turah tih rik an ni deuh ṭhin niin a sawi a, ram a kan tirh khan tih rik ni se chuan mi tam tak chu kangmei chhuah nasat zualna, tlang lamah an tlan zawk a rinawm a, chhiatna nasa zawk a thleng thei a ni, tiin a sawi.