Siren chungchanga sawisel tawktu Maui Emergency Chief a bang

US-a Hawaii state-a Maui thliarkar ram kang nasa tak chungchangah, siren tih rik a nih loh avanga sawiselna tam tak an tawh hnuah Maui emergency management chief, Herman Andaya chu a hna aṭangin a bang.

Hawaii hi khawvela siren warning system nei tam ber zinga mi a ni a, mahse kar liam taa ram kang nasa tak a thlen ṭum khan siren 80-te chu tih rik an ni lo. Hei vang hian sawisel an tawk nasa hle. Ram kan tirh khan siren-te hi tih rik ni se, nunna chan tam tak chhanhim theih tur niin an sawi. Ram kang vang hian mi 111 an thi tawh a, chin hriat loha awm hi 1,000 chuang an la awm mek.

Maui Emergency Management Agency boss Andaya chuan siren an tih rik loh chungchangah an thutlukna siamah a inchhir loh thu a sawi. Andaya chuan tih rik ni ta se kangmei chhuak tuar nasa ber, Lahaina khuaa cheng tam tak chu ram kan nasatna, tlang lamah an tlanchhe ngei dawn a, hei hian chhiatna nasa zawk a thlen thei dawn a ni, a ti. Mahse Lahainaa khuaa chengte chuan a sawifiahna hi an pawm lo tih sawiin, siren ri se chuan hlauhawm lo thleng tur atan lo invengin, an lo inbuatsaih lawk thei dawn tih an sawi ve thung.

Andaya hian a banna chhanah hian hriselna lam ṭhat tawk loh a chhuanlam a, mahse emergency management-a an chet fuh loh vanga bang erawh a nih rin a ni.