Pakistan caretaker PM advisor atan Kashmiri separatist nupui ruat

Pakistan chuan catetaker prime minister Anwaarul Haq Kakar special advisor atan, India aṭanga Kashmir inlakhhran duhtu, jail-a tang mek Yasin Malik-a nupui, Mushaal Hussain Malik a ruat.

Caretake PM Kakar kaihhruai sorkara cabinet member tur mi 19-te chu Ningani zan khan president Arif Alvi chuan rinawmna thu tiamtirin a lalut. Hemi hnua Special Advisor to Prime Minister (SAPM) atana ruat mi panga hming a puan zingah Yasin Malik nupui hi a tel.

Mushaal hi human rights and women empowerment-a special advisor atan ruat a ni. Special advisor hi junior minister aiin an status hniam zawk mah se, thil pawimawh tak takah Prime Minister an ṭawiawm ṭhin. Special advisor atana ruat mi dang palite chu - Jawad Sohrab Malilk, vice admiral (retired) Iftikhar Rao, TV anchor leh writer Washih Shah leh Syeda Arifa Zehra te an ni.

Jammu and Kashmir Liberation Front (JKLF) chief Yasin hi a nupui, Pakistani artist Mushaal nen hian kum 2009 khan Rawalpindi-ah an innei a ni. Yasin hi firfiakte sum pea puh a nih chungchangah May thla khan India-a trial court chuan thiam loh chantirin dam chhung tang turin a hrem a, Delhi-a Tihar Jail-ah a tang mek a ni.