Canada ram kang vangin mi 20,000 sawn chhuak

Canada hmar lamah ram kang vangin Yellowknife khuaa cheng mi 20,0000-te chu venthawn thilah sawn chhuah an ni. Car leh thlawhtheihna hmangin khuaa chengte hi hruai chhuah an ni.

Official-te chuan Northwest Territories-a ram kang mek hi Ningani zan khan Yellowknife khua aṭanga km 16 vel a kangkai tawh tih an sawi a, khawpui chhung hi a thlen mai a hlauhthawnawm avangin inthiarfihlim turin an ti a ni.

Canada khawthlang lam, British Columbia-a Kelowna khaw bul pawh nasa taka kangin in ṭhenkhat a chhe tawh bawk. British Columbia official-te chuan hmun 370 velah ram hi a kang tih an sawi a, khaw ro tak leh thli tleh vangin kangmei chhuak hi ṭhelh a harsat thu an sawi. West Kelowna khuaa chengte pawh hmun him lama insaseng tura hriattir an ni tawh bawk.

Kumin hian Canada hian ram kang a tuar ngun hle a, Canadian Interagency Forest Fire Centre-in a tarlan danin hmun 5,700 velah ram kang hi thlengin, ram sq km 1,37,000 vel a kang tawh a ni. Ningani thleng khan hmun hrang hrang 1,046-ah ram hi a la kang a ni.