Imran Khan-a thawhpui Shah Mehmood Qureshi man ve leh

Pakistan prime minister hlui, Imran Khan-a thawhpui hnai leh ṭha tak, foreign minister hlui Shah Mehmood Qureshi chu Inrinni khan Islamabad-a a chenna in aṭangin man a ni ve leh.

Kum 67 mi, Qureshi hi Pakistan Tehreek-e-Insaf (PTI) party Vice Chairman a ni a, man a nih hnu hian Federal Investigation Agency’s (FIA) headquarters-ah hruai nghal a ni. Qureshi man a nihna chhan tak hi sawi chian a ni lo a, mahse, PTI hotu, Imran Khan-a laka diplomatic cable tiput rua puhna chungchanga thubuai siamsak kaihhnawihah thu zawh fiah nia sawi a ni. Diplomatic cable bo lai hian Qureshi hi Foreign Minister a ni.

PTI chuan social media lamah PTI vice chairman Qureshi chu dan kalha man a ni tih an tarlang.

Diplomat cable (cipher)-ah hian nikuma US State Department official, Assistant Secretary of State for the Bureau of South and Central Asian Affairs Donald Lu leh Pakistan palai Asad Majeed Khan-te meeting neih chungchangah tarlan a ni. A copy hi hetih laia prime minister Imran Khan hnenah pek a ni. Mahse PM aṭanga ban a nih hnuah secret cable hi US media lamin an tichhuak a, Pakistan sorkar chuan he thil hi PTI hotu hian a tiput ru niin an puh. Mahse Imran Khan chuan a tibo niin a sawi thung.

Principal Secretary hlui Azam Khan chuan cipher hi PTI hotu hnenah hian a pe ngei a, a hnua vawi tam tak pe let tura an tih pawhin a pe kir tawh lo a, a dahna a hriat tawh loh thu a lo sawi niin a tarlang. Principal secretary hlui, Azam Khan chuan PTI hotu hian cipher hi a tibo tak tak a nih chuan, Official Secrets Act hnuaiah thubuai rip tak siamsak theih a ni, a ti.

Kum 70 mi, Imran Khan hi eiruk thubuaiah tun thla tir lam khan thiam loh chantirin kum thum tang tura hrem a lo ni tawh a, tunah hian jail-ah a tang mek a ni.