Russia-in Ukraine theatre kap fuh, mi 7 an thi

Ukraine-a Chernihiv khawpuia theatre chu Inrinni zing khan Russia chuan missile hmangin a kap a, mi pasarih an thi a, hliam 144 an awm bawk. Thi zingah hian hmeichhe naupang kum ruk a tel niin Ukraine official-te chuan an sawi.

Police-te chuan hliam tuar zinga mi 25 te chu an dinhmun a ṭhat loh avangin hospital-ah dah a ni tih an sawi a, hliam zingah hian naupang 15 an tel bawk a ni.

Chernihiv khaw beihnaah hian main square leh university building-te pawh a chhe tel bawk. He khawpui hi Ukraine chhim lam leh Belarus ram inrina aṭanga km 50 vela hlaa awm a ni a, kum 2022-a Russia-in Ukraine ram a run tirh lam khan Russia sipaite chuan a la hman a ni. Theatre beihnaa thite hi khawpuiah ni thum chhung sun an ni ang.

Russia chuan Novgorod reigon hmar thlang lamah an military airfield chu Ukraine drone hmanga beih a ni a, kangmei a chhuak a, thlawhtheihna pakhat a chhia niin an sawi ve bawk.

Ukraine president Volodymyr Zelenskyy chu Sweden ramah a zin mek a, hei hi Russia-in an ram a run hnuah Sweden a tlawhna hmasa ber a ni. Sweden prime minister Ulf Kristersson nena joint news conference an neihah, Zelenskyy chuan Russia chet dan chu an dem thu sawiin, hetianga chetna do let turin an thawhho a ngai tih a sawi. Hruaitu pahnihte hian Ukraine leh Sweden ramte thawh dunna ṭha leh chak zawk siam an remtih thu an sawi bawk. Zelenskyy hian Sweden lal, King Carl XVI Gustaf leh Queen Silvia-te pawh a hmu dawn a ni.