Pakistan President-in security law thar a pawm lo

Pakistan president Arif Alvi chuan national security law thar pahnihte chu a thlawp lo a, a hming a sign hnan duh lo.

President chuan law-a chantir tura Official Secrets Amendment Bill 2023 leh Pakistan Army Amendment Bill 2023-a hming ziah hnan ngai chu, heng dan siam thar pahnihte hi a pawmpui theih loh avangin a hming a ziak thei lo tih a sawi. Bill pahnihte hi Pakistan Parliament-a in hnihte chuan an lo pass tawh a ni.

Alvi hi prime minister hlui, Imran Khan-a party, Tehreek-e-Insaf (PTI) member a ni. Bill pahnihte chu hming sign loin legislature-ah hun tiam chhung thawn kir turin a staff-te a hrilh tih a sawi.

Ministry of law and justice chuan President thiltih dan chu a ṭha lo hle tih a sawi a, 'President hian thlan tur pahnih a nei a, bill-te chu lo pawmpui emaw, Parliament hnenah hun pe a, hun tiam chhunga ngaihtuah emawin a ti tur a ni," a ti a, mahse, President hian hengte hi a ti lo ve ve niin a sawi. Parliament-in a pass tawh, ram hruaituin a lo hnawl chu Constitution kalphung pawh a ni lo tiin a sawi.

Pakistan Constitution hnuaiah, President hian draft bill chu a lo sign duh lo emaw, ni 10 chhunga a duh lohna chhan sawi a, ngaihtuah ṭha tura a thawn let leh lo a nih chuan, Parliament in hnihin an pawm tawh a nih si chuan law-ah chantir a ni dawn tho a ni.