Israel-in East Jerusalem tan USD mtd 843 ruahman

Israel sorkar chuan Palestinian ram a luah, East Jerusalem-a insawhngheh zual zelna turin, a chei leh thuam ṭhatna turin kum nga chhung atan USD mtd 843 (shekel tld 3.2) a ruahman.

Sorkar chuan Pathianni khan thuchhuah siami, kum 2024-2028 chhunga East Jerusalem budget atana sum ruahman hi a puang a ni. Heng sumte hi khawtlanga intluktlanna kalpuina tur leh, economic development atana tih a nih thu a tarlang bawk.

Prime minister Benjamin Netanyahu chuan sorkar ruahmanna thar hi puangin, Jerusalem hmelhmang pawh a thlak danglam dawn a ni, a ti. Hei hian high school diploma dawng pawh nasa takin a tihpun phah ngei dawn tih a sawi.

East Jerusalem-ah hian school-ah Palestinian curriculum, tawjihi tih chu zirtir an ni a,mahse, Israel sorkar chuan zirlaite chu Israeli curriculum zirtir a tum zawk a ni. Curriculum thlak tumna hi Palestinian lam chuan an dodal nasa hle.