Greece hmar lamah ram kang nasa tak a thleng

Greece ram hmar lam, Turkey nena an inrina bulah Inrinni liam ta aṭang khan ram a kang a, hei vang hian kang mei chhuahna bul hnaia khaw pangaa chengte chu hmun him lamah sawn chhuah an ni.

Ram kang hian Alexandroupolis khua a hnaih tawh hle a, thli chak tak a tleh tel avangin a ṭhelh pawh a harsa niin thuneitute chuan an sawi. Ram kang hi kangṭhelhtu mi 200 velin an aircraft 16 nen an ṭhelh mek a, volunteer leh police eng emaw zatin an pui bawk.

Minister for civil protection, Vassilis Kikilias chuan mipuite chu fimkhur turin a chah a, an ram venhim chu a pawimawh hmasa ber tih a sawi.

Ramri bul, Turkey lama Ipsala khua pawhin Pathianni aṭang khan border crossing an khar bawk a ni.

Kum tinin Greece hian nipui laiin ram kang hi an tuar a, official-te chuan climate change vangin ram kang hi a nasa chho zel tih an sawi. European Union pawhin Europe ram hrang hranga ram kang thleng chu climate change vang niin an sawi ve bawk.

Greece-in ram kang vanga chhiatna a tawrh nasat ber chu kum 2018-a thleng kha niin Athens khawpui bula ram kang avangin mi 104 in an thih phah a ni. Thla hmasa khan Rhodes resort island-ah ram zau tak a kang bawk a, tourist 20,000 lai sawn chhuah an ngai a ni.