Trump-a'n Republican Presidential debate-ah tel a tum lo

US President thlanna neih tura Republican party candidate chuh tumte'n, tunkara Presidential debate hmasa ber an neih turah Donald Trump chuan tel a tum lo tih a sawi.

Trump chuan US President a nih laiin hlawhtlinna hrang hrang neiin record ṭha tak a nei a, America mipuite'n tunge a nih an hre vek tawh tih sawiin, debate hmasa ber turah hian inlan a tum loh thu a sawi a ni.

2024 US President thlanna neih tur atana Republican presidential debate hmasa ber tur hi Nilaini hian Milwaukee, Wisconsin-ah neih a ni ang.

Debate-a tel tur hian party presidential candidate nih tumte tan hian poll hrang hrang buatsaihah thlawptu 1% tal an neih phak a ngai a ni. He debate-a tel tur hian candidate chuh tum eng emaw zat chu an tling tawh a, an zingah hian vice president hlui Mike Pence, Florida governor Ron DeSantis, South Carolina governor hlui Nikki Haley-te pawh an tel.

Republican National Committee (RNC) Chair Ronna McDaniel chuan Trump chu a ngaihdan thlak a, debate-ah hian inlan tura a duh thu a sawi a, America mipuite chuan candidate zawng zawngte thusawi an hriat chu a pawimawh a ni, a ti.