Thailand PM hlui Thaksin Shinawatra an ramah kir; Kum 8 tang turin Bangkok jail-ah dah lut nghal

Thailand prime minister hlui Thaksin Shinawatra chu kum 15 zet ram pawn lamah himna zawnga a tawm bo hnuah, nimin khan an ramah a kir. Mahse an ram a thlen hnu hian man nghal niin, kum riat tang turin Bangkok tan inah dah nghal a ni.

Thaksin hian private thlawhtheihna hmangin an ram huna nimin zing dar 9 vel khan Bangkok-a Don Mueang Airport a thleng. An ram lal zahna a hlan hnuah, police conovy hmangin Supreme Court-ah hruai a ni a, PM a nih laia a thuneihna dik lo taka hmanga puhna leh, a thubuai dang neihte ngaithuah nghal a ni. Hemi hnu hian kum riat tang turin Bangkok Remand Prison-ah dah a ni tih Supreme Court thuchhuah chuan a tarlang.

Kum 2001 khan Thaksin hi Prime Minister atan thlan a ni a, kum nga hnua inthlanah pawh hneh taka thlan tlin zui leh a ni. Mahse kum 2006, September thlaa New York-a a awm laiin, sipai chakna hmangin a kaihhruai sorkar paih thlak a ni a, Thaksin pawh a thuneihna dik lo taka hmanga puhin thiam loh chantir a ni bawk. Kum 2008 khan ram pawn lamah himna zawnga tlan chhuakin, a hun tam zawk chu Dubai-ah a hmang.

Kum riat tang tura hrem ni mah se, kum 74 mi Thaksin hian an lal hnenah ngaihdam dilna a thlen dawn a, jail chhung aṭangin petiton hi a theh lut thei ang. A tan hun pawh hi tihtawisak a nih ngei rin a ni bawk.