Japan-in Fukushima plant tui paih chhuak tawh dawn

Japan sorkar chuan naktuk aṭang hian lirnghingin a sawi chhiat tak, Fukushima nuclear power plant aṭangin tui metric ton mtd 1 chuang chu tuifinriatah a paih chhuak tawh dawn tih a sawi. A thiltih tur hi tualchhung mite bakah China sorkarin pawhin an sawisel a ni.

Kum hnih liam ta khan Tokyo Electric Power Company (Tepco) enkawl, he plant hi tihtawp a nih theihna atan radioactive water a sawngbawl tawh chu tuifinriata paih chhuah hi sorkar chuan a lo remti tawh a ni. Mahse hei hi fishing industry lamin an duh lo hle a, plant-a tui paih chhuah hian an eizawnnate a tichhe thei dawn niin an sawi.

Prime minister Fumio Kishida chuan Tepco hnenah hian Nuclear Regulation Authority-in a pawm dan ang thlapa tui hi paih chhuak tura hriattir an nih thu a sawi. Naktuk aṭangin tui hi paih chhuakin, ni 17 vel a ngai dawn niin Tepco chuan an sawi ve bawk.

Tepco chuan plant aṭanga tui paih chhuah turah hian litre khatah tritium 190 becquerels (unit of radioactivity) zel a awm a, World Health Organisation-in in atana him china a tih chu tui litre khatah titrium 10,000 bacquerels a nih avangin, an tui paih chhuah tur hi a him tawk hle tih an sawi. Mahse heti chung hian China chuan Japan-a prefecture 10 aṭanga lui lam sa lak luh a khap nghal.