Myanmar sipai nena inzawmna chhu chat turin UN phût

Civil society group 514 telna, Progressive Voice chuan United Nations chu Myanmar civil sorkar paihthlatu, Myanma sipaite nena inzawmna chhu chat turin an phut.

Progressive Voice chuan thuchhuah siamin, tun hnaiah UN relief chief Martin Griffiths-a'n Myanmar a tlawh chungchang chu sawiselin, ram chhung mipuite harsatna sutkianna tura hmalaknaah a hlawhchham niin an sawi.

UN under secretary general for human affairs and emergency relief coordinator, Griffiths hi kar liam ta khan ni thum chamin Myanmar-ah hian a zin a, Myanmar sipai sorkar enkawl, Global New Light of Myanmar chuan sipai hotu lu, senior general Min Aung Hlaing nena an inchibai lai thlalakte chu a tichhuak a ni.

Griffiths hian Rohingya camp leh Sittwe khaw bula thla thum liam taa cyclone Mocha-in chhiatna nasa tak a thlenna hmunte a tlawh. Myanmar mipui hmun thuma ṭhena hmun khat vel chu chhawmdawl ngaiin an awm mek tih sawiin, sipai sorkar chu chhawmdawlna pek dan turah pawh ṭha zawka kalpui turin a ngen.

Hetih lai hian Progressive Voice chuan UN hian sipai sorkar chu a thawhpui chuan chhawmdawlnate chu ṭha taka sem chhuah a ni dawn lo tih sawiin, sipaite chuan ṭanpui ngaite ṭanpuina tur kawng chu an dang tlat niin an puh. Hei vang hian chhawmdawlna ṭha taka pek chhuah a nih theihna atan UN chu sipai sorkar thawhpui lo a, civil sorkar paih thlak aiawhtu atana din, National United Government (NUG) bakah hnam bil pawl hrang hrang hrang leh civil society-te chu thawhpui turin an ngen a ni.