Damdawi inah Thailand PM hlui Thaksin dah lut

Thailand prime minister hlui, Thaksin Shinawatra chu kum 15 zet ram pawn lamah a tlan chhiat hnuah Thawhlehni khan an ramah a kir a, jail-ah dah luh nghal niin, nimin zing khan a blood pressure leh oxygen level hniam avangin Bangkok-a police damdawi inah dah luh a ni.

Corrections Depart­ment thupuangtu, Sitthi Sutivong chuan kum 74 mi, Thaksin hi a hriselna a ṭha tawk loin, a bikin lung lam natna te a nei a, jail damdawi inah enkawlna ṭha hi an neih loh avangin police hospital-ah sawn a ni tih a sawi.

Thaksin hi Thailand a thlen hnuah Supreme Court chuan prime minister a nih laia a thuneihna dik lo taka hmanga puhna thubuaiah thiam loh chantirin, kum riat jail tang turin hrem a ni a, Bangkok jail-ah dah luh nghal a ni.

Thailand-a Thaksin a kir hnu lawkah hian Thailand prime minister thar atan Pheu Thai party candidate, Srettha Thavisin chu thlan tlin a ni ta bawk. May thlaa inthlanpui an neih hnuah, thla thum dawn chu Prime Minister thar hi thlan fel lohin an awm hman a ni.

Inthlana seat la hnem ber, Move Forward Party PM candidate chuan Parliament-ah vote hmuh ngai zat a hmuh phak loh avangin, a thawh hnihna atan vote hi an la leh a ni. Pheu Thai party Thaksin Shinawatra party din hnuaia mi a ni a, sipai thlawp party an thawhpui a ni. PM atana thlan, Thavisin hi nimin tlai khan an ram lal pawhin a pawm tawh bawk.