Thlawhtheihna tlaah Wagner chief Yevgeny Prigozhin a thi

Russia khawpui, Moscow hmar lamah Nilaini tlai khan private jet a tla a, thlawhtheihna tlaah hian Russian mercenary force, Wagner hotu Yevgeny Prigozhin pawh telin a thi.

Russia ministry for emergency chuan Tver Region-a Kuzhenkino khaw bula private Embraer Legacy aircraft tlaah hian mi 10 chuangin an zinga pathum chu crew member an ni tih a sawi. Thlawhtheihnaa chuangte hi an vaiin an thi vek ni-a sawi a ni a, ruangte hi hmuh kim an ni tawh ni-a sawi a ni bawk. Thi zingah hian Prigozhin bakah a second-in-command Dmitry Utkin pawh a tel.

Rosaviatsia, Russia aviation agency chuan thlawhtheihna hi Moscow aṭanga St. Petersburg pana thlawk a nih thu leh, a ṭum hma second 30 velah buaina hi a tawk niin a sawi.

Investigative Committee chuan thlawhtheihna chet sual chhan hi an chhui a, safety rules bawhchhiat a ni em tihte chhui chian a nih tur thu a puang.

Prigozhin hi kum 62 mi niin, kum 2014 khan private military company, Wagner hi a din a, Middle East leh Africa-a Russia hmalakna puitu pawimawh tak niin, Russia-in Ukraine a run hnuah Russia sipaite thlawptu an ni zui bawk. Mahse June thla khan Wagner laka Russia sipaite chet danah lungawi loin Prigozhin hi a hel a, an lungawi lohna lantir tumin ralthuamte nen Moscow khawpui an pan a, mahse, Belarus president Alexander Lukashenko hmalakna hnuaiah an helna hi an titawp a, Prigozhin pawhin a mi leh sa ṭhenkhatte nen Belarus lamah hian an kal zui a ni. Hemi hnu hian a chanchin hi hriat zui lutuk a ni lo a, Kremlin-a meeting-ah vawi khat chu hmuh niin, a hnuah mipui hmuhah a inlar zui lo hle. June thla aṭang khan thu puanchhuahna atana a hman ber, a telegram channel pawh a hmang zui tawh lo a ni.