UN Security Council-in Myanmar sipai chet dan an dem

United Nations Security Council member 15 zinga 13-te chuan thuchhuah siamin, Myanmar sipaite chet dan an dem thu sawiin, civil mi an thah ṭhinte titawp tur leh, an ram buaina titawp tura an phut thu an sawi. Thuchhuah siam leh Myanmar sipaite demna thu sawitu zingah hian China leh Russia erawh an tel ve lo.

UNSC member-te hian Myanmar buaina chungchang sawiho a, Nilainia closed-door briefing an neih hnuah thuchhuah hi an siam a ni.

Council member-te chuan Myanmar sipai, kum 2021 February thlaa Aung San Su Kyi kaihhruai civil sorkar paih thlatute chu an rama tharum thawhna an thlente titawp tur leh, civil mi tawrhna an thlente chu titawp turin an phut tih an sawi. Nikum December thlaa Myanmar chungchanga Security Council resolution siam hnuah pawh, Myanmar ramah hian hmasawnna hmuh tur a la awm lo a ni, an ti.

Britain deputy UN ambassador James Kariuki chuan UN headquarters, New York-ah an thuchhuah hi a chhiar chhuak a, Myanmar ram buaina leh a ram mipuite tawrhna chuan an rilru a luah hle tih a sawi.

Kariuki chuan buaina a thlen hnuah Myanmar mipui maktaduai 18 chuang chu chhawmdawl ngaiin an awm a, mi maktaduai hnih velin himna zawngin an chenna in an chhuah san tawh bawk a ni, a ti. Mi maktaduai 15 chuan ei leh in lamah harsatna an tawh mek thu a sawi a, ṭanpui leh chhawmdawl ngaite pui chhunzawm zel turin theihtawp an chhuah zel tur thu a sawi lang bawk.