China-in 'mahni hmasial'-ah Japan a puh

Japan chuan Fukushima nuclear plant-a tui chu Ningani aṭang khan Pacific Ocean-ah a paih chhuak ṭan ta a, hei hi China chuan na taka sawiselin, Japan thiltih chu 'mahni hmasial' tiin a puh.

Japan-in lirnghing avanga Fukushima nuclear plant-a reactor chhiate tihdaihna atana a tui hman, tuifinriata a paih chhuah tum hi a hma aṭangin a ṭhenawm ramte chuan an lo sawisel tawh a ni. Mahse tui hi uluk taka sawngbawl a ni tawh a, mihring tan pawh a him nia an sawi hnuah a paih chhuak ṭan a, a ṭhenawm ramte erawh an ngaih a ṭha thei lo. China chuan Japan aṭanga lui lam sa lak luh a khap nghal a ni.

Plant operator, Tokyo Electric Power (Tepco) chuan Japan sorkarin a pawmpui hnuah, nimin khan plant aṭang hian tui tam vak lo chu a pump chhak ṭan a ni, an paih chhuahna hmunah thil fel lo engmah hmuh a nih loh thu a sawi bawk. An tui paih chhuahna hmun aṭang hian sample lain, an endik leh dawn a ni. Plant aṭanga tui paih chhuah hi UN atomic watchdog lam pawhin an vil bawk ang.