Ram 6-in BRICS an zawm dawn

Member ram panga - Brazil, Russia, India, China leh South Africa awmna, BRICS chu tihlen a ni dawn a, nakkum January 1 aṭangin ram dang parukte'n full member angin an zawm dawn.

BRICS chair ni lai, South Africa president Cyril Ramaphosa chuan full member tur hian ram paruk an sawm belh tih sawiin, chung ramte chu Egypt, Ethiopia, Iran, Argentina, United Arab Emirates leh Saudi Arabia-te an ni.

Johannesburg, South Africa-a ni thum awh BRICS summit neih chu nimin khan zawh fel a ni a, he summit-ah hian an pawl huang zauh chungchang hi an ngaihtuah zinga pakhat niin, ram 20 chuangin full membership hi an dil a ni. Member ram tihpun hi China hian a duh a, South Africa leh Russia pawhin an thlawp a ni. Member thar atana an sawm ram parukte hi China’s Belt and Road Initiative (BRI) zawm tura inremna pawh lo ziak tawh vek an ni bawk.